លោក ខឹម វាសនា​ ដីរបស់ខ្ញុំនៅឯមណ្ឌលគីរីតែមួយចង្អាមក៏មិនអោយបាត់ដែរ

០១.កញ្ញា.២០១៦ / តុលាការខេត្តមណ្ឌលគីរី --------------------- អ្នកគាំទ្រគណបក្សសម្ព័ន្ធដើម្បីប្រជាធិបតេយ្យជាង១០០០នាក់កំពុងតាមដានស្ថានកាណ៍នៅមុខសាលាដំបូងខេត្តមណ្ឌលគីរី លោក ខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យ កំពុងមានវត្តមាននៅសាលាដំបូងខេត្តមណ្ឌលគីរី ដើម្បីឆ្លើយបំភ្លឺទៅតាមដីកាកោះរបស់ព្រះរាជអាជ្ញារង សូ សុវិទ្យា ទាក់ទងនឹងបណ្តឹងរបស់បុគ្គលឈ្មោះកុល សុខុម ក្នុងដំណើររឿងរំលោទលើទំនុកចិត្ត។ដោយបុគ្គលកុល សុខុម បានចោទលោក ខឹម វាសនាថាបាន ក្លែងស្នាមមេដៃ និងឈ្មោះសរសេរដៃ។ សូមបញ្ជាក់ថាកាលពីថ្ងៃទី២០ ខែកក្កដា ឆ្នាំ២០១៦ លោកខឹម វាសនា បានប្តឹងឈ្មោះកុល សុខុម មកនាយកដ្ឋាននគរបាលព្រហ្មទណ្ឌ ពីការលាក់បាំងតម្រុយ (មិនទទួលស្គាល់ស្នាមក្រយ៉ៅដៃ និងអក្សរសរសេរឈ្មោះរបស់ខ្លួន)នៅក្នុងកិច្ចសន្យាទទួលប្រាក់ពីលោកខឹម វាសនា តាំងពីថ្ងៃទី១៥ ខែមីនា ឆ្នាំ២០០៨។ តាមរយៈនគរបាលបច្ចេកទេសកោសល្យវិច័យ បានសន្និដ្ឋានយ៉ាងច្បាស់ថាឯកសារមានសញ្ញាសម្គាល់E1.E2 និងE3ដែលមានឈ្មោះ និងស្នាមមេដៃបុគ្គលកុល សុខុម គឺមានចំណុចពិសេសរួម និងចំណុចពិសេសដោយឡែកដូចគ្នាតែមួយ ហើយវាមានលក្ខណៈសម្បត្តិពិសេសគ្រប់គ្រាន់ ដើម្បីវាយតម្លៃសន្និដ្ឋានថាជាស្នាមមេដៃនិងឈ្មោះបុគ្គលនោះ ពិតជាដូចគ្នាប្រាកដមែន។